റിയാദ്- സൗദി കിരീടാവകാശിയും പ്രധാനമന്ത്രിയുമായ പ്രിന്‍സ് മുഹമ്മദ് ബിന്‍ സല്‍മാന്‍ രക്തദാനം ചെയ്തുകൊണ്ട് 2026-ലെ വാര്‍ഷിക ദേശീയ രക്തദാന പ്രചാരണത്തിന് തുടക്കം കുറിച്ചു. ജീവകാരുണ്യ പ്രവര്‍ത്തനങ്ങളോടുള്ള അദ്ദേഹത്തിന്റെ പ്രതിബദ്ധതയും ജനങ്ങളുടെ ആരോഗ്യ സംരക്ഷണത്തോടുള്ള കരുതലും വെളിവാക്കുന്നതായിരുന്നു ഈ പ്രവര്‍ത്തനം. സമൂഹത്തില്‍ സേവനസന്നദ്ധതയും ദാനശീലവും വളര്‍ത്തുന്നതിനും, രക്തദാനത്തിലൂടെ ജീവന്‍ രക്ഷിക്കാന്‍ ജനങ്ങളെ പ്രോത്സാഹിപ്പിക്കുന്നതിനുമായി രാജ്യം നടപ്പാക്കുന്ന വിവിധ പദ്ധതികളുടെ തുടര്‍ച്ചയായാണ് ഈ പ്രചാരണം.

സൗദി സമൂഹത്തിന്റെ മൂല്യങ്ങളായ സാഹോദര്യവും പരസ്പര സഹകരണവും പ്രതിഫലിപ്പിക്കുന്ന പ്രചോദനാത്മകമായ സന്ദേശമാണ് കിരീടാവകാശിയുടെ ഈ മാതൃകാപരമായ പ്രവൃത്തി നല്‍കുന്നത്. കൃത്യമായ ഇടവേളകളില്‍ സ്വമേധയാ രക്തദാനം ചെയ്യേണ്ടതിന്റെ പ്രാധാന്യത്തെക്കുറിച്ച് പൊതുജനങ്ങളില്‍ അവബോധം വളര്‍ത്തുകയാണ് ഈ കാമ്പയിന്‍ ലക്ഷ്യമിടുന്നത്. അത്യാഹിത വിഭാഗങ്ങളില്‍ ചികിത്സയിലുള്ളവര്‍, കാന്‍സര്‍ രോഗികള്‍, മറ്റ് ഗുരുതര രക്തസംബന്ധമായ രോഗങ്ങളാല്‍ ബുദ്ധിമുട്ടുന്നവര്‍ എന്നിവര്‍ക്ക് ആവശ്യമായ രക്തവും അതിലെ ഘടകങ്ങളും ലഭ്യമാക്കി സ്വയംപര്യാപ്തത കൈവരിക്കാന്‍ ഇത് സഹായിക്കുന്നു.

ആരോഗ്യ മേഖലയെ പിന്തുണയ്ക്കുന്നതിനും സന്നദ്ധപ്രവര്‍ത്തനങ്ങള്‍ പ്രോത്സാഹിപ്പിക്കുന്നതിനുമുള്ള ഭരണകൂടത്തിന്റെ ദീര്‍ഘവീക്ഷണത്തോടെയുള്ള നിലപാടിന്റെ ഭാഗമായാണ് ഈ പദ്ധതി നടപ്പാക്കുന്നത്. രാജ്യത്തുടനീളമുള്ള രോഗികളുടെ ചികിത്സാ ആവശ്യങ്ങള്‍ തടസ്സമില്ലാതെ നിറവേറ്റുന്നതിനായി സുരക്ഷിതവും സുസ്ഥിരവുമായ രക്തലഭ്യത ഉറപ്പാക്കാന്‍ ഈ കാമ്പയിന്‍ ഉപകരിക്കും. ഹെല്‍ത്ത് സെക്ടര്‍ ട്രാന്‍സ്‌ഫോര്‍മേഷന്‍ പ്രോഗ്രാമിന്റെയും സൗദി വിഷന്‍ 2030-ന്റെയും ലക്ഷ്യങ്ങള്‍ക്ക് അനുസൃതമായി സ്വമേധയാ ഉള്ള രക്തദാന സംസ്‌കാരം വളര്‍ത്തുന്നതില്‍ രാജ്യം വലിയ മുന്നേറ്റമാണ് നടത്തുന്നത്.

കഴിഞ്ഞ വര്‍ഷത്തെ ദേശീയ കാമ്പയിന്‍ വലിയ ആരോഗ്യ-സാമൂഹിക സ്വാധീനമാണ് രാജ്യത്തുണ്ടാക്കിയത്. 2025-ല്‍ രക്തദാതാക്കളുടെ എണ്ണം നാല് മടങ്ങായി വര്‍ധിക്കുകയും, ബ്ലഡ് ബാങ്കുകളുടെ ചരിത്രത്തിലെ ഏറ്റവും ഉയര്‍ന്ന കണക്കായ 65,000-ത്തിലധികം പേര്‍ രക്തം നല്‍കുകയും ചെയ്തു. ഇതില്‍ 100 ശതമാനവും സന്നദ്ധ രക്തദാനമായിരുന്നു എന്നതിനൊപ്പം 85 ശതമാനത്തിലധികം പേരും ആദ്യമായി രക്തം നല്‍കിയവരായിരുന്നു. ഈ മുന്നേറ്റം വഴി 63,000-ത്തിലധികം ആളുകള്‍ക്ക് രക്ത യൂണിറ്റുകളും, 10,000 പേര്‍ക്ക് പ്ലേറ്റ്ലെറ്റുകളും, 10,000 പേര്‍ക്ക് പ്ലാസ്മയും നല്‍കാന്‍ സാധിച്ചു.