റിയാദ്: സൗദി അറേബ്യയില്‍ നിയമപരമായ റസിഡന്‍സി രേഖകളില്ലാതെ കഴിയുന്ന യെമന്‍ പൗരന്മാരുടെ പദവി ശരിയാക്കാനുള്ള നടപടികള്‍ക്ക് സൗദി ആഭ്യന്തര മന്ത്രാലയം തുടക്കമിടുന്നു.
യെമന്‍ പ്രസിഡന്‍ഷ്യല്‍ ലീഡര്‍ഷിപ്പ് കൗണ്‍സില്‍ ചെയര്‍മാന്‍ റഷാദ് അല്‍-അലിമി നല്‍കിയ അഭ്യര്‍ത്ഥനയെത്തുടര്‍ന്ന് സല്‍മാന്‍ രാജാവിന്റെ പ്രത്യേക നിര്‍ദ്ദേശപ്രകാരമാണ് ഈ സുപ്രധാന നടപടിയെന്ന് സൗദി പ്രസ് ഏജന്‍സി റിപ്പോര്‍ട്ട് ചെയ്തു. വിദേശകാര്യ മന്ത്രാലയം, മാനവ വിഭവശേഷി-സാമൂഹിക വികസന മന്ത്രാലയം, സൗദി ഡാറ്റ ആന്‍ഡ് ആര്‍ട്ടിഫിഷ്യല്‍ ഇന്റലിജന്‍സ് അതോറിറ്റി എന്നിവരുമായി സഹകരിച്ചാകും ആഭ്യന്തര മന്ത്രാലയം പദ്ധതി നടപ്പാക്കുന്നത്. യെമനെയും അവിടുത്തെ ജനങ്ങളെയും സൗദി അറേബ്യ തുടര്‍ച്ചയായി പിന്തുണയ്ക്കുന്നതിന്റെ ഭാഗമായാണ് ഈ പദ്ധതിയെന്ന് അധികൃതര്‍ വ്യക്തമാക്കി.
പദ്ധതിയുടെ ആനുകൂല്യം ലഭിക്കുന്നതിന് യെമന്‍ അപേക്ഷകരുടെ കൈവശം പാസ്പോര്‍ട്ട് ഉണ്ടായിരിക്കണമെന്ന് മന്ത്രാലയം അറിയിച്ചു. ജനറല്‍ ഡയറക്ടറേറ്റ് ഓഫ് പാസ്പോര്‍ട്ട്‌സിന്റെയും മറ്റ് ബന്ധപ്പെട്ട സര്‍ക്കാര്‍ ഏജന്‍സികളുടെയും ഔദ്യോഗിക മാധ്യമങ്ങളിലൂടെ അപേക്ഷ സ്വീകരിച്ചു തുടങ്ങുന്ന തീയതിയും വിശദമായ ചട്ടങ്ങളും അധികൃതര്‍ ഉടന്‍ തന്നെ പ്രഖ്യാപിക്കും.
ഇറാന്‍ പിന്തുണയുള്ള ഹൂതി തീവ്രവാദികള്‍ക്കെതിരെയുള്ള സൈനിക നീക്കത്തിന്റെ ഭാഗമായി തന്ത്രപ്രധാനമായ ബാബ് അല്‍-മന്ദബ് കടലിടുക്കിന്റെയും മോഖ തുറമുഖ നഗരത്തിന്റെയും നിയന്ത്രണം പിടിച്ചെടുത്തതായി യെമന്‍ സര്‍ക്കാര്‍ സേന പ്രഖ്യാപിച്ച് മണിക്കൂറുകള്‍ക്കകമാണ് സൗദി അറേബ്യയുടെ ഈ പ്രഖ്യാപനം പുറത്തുവന്നത്.
.jpg)
Related News
