ദുബായ്: ദുബായില്‍ നിന്ന് തെല്‍ അവീവിലേക്ക് പുറപ്പെട്ട ഫ്‌ലൈ ദുബായ് വിമാനം (FZ1073) സൗദി അറേബ്യയിലെ തബൂക്കില്‍ അടിയന്തരമായി ഇറക്കിയ സംഭവത്തില്‍ ദുരൂഹത തുടരുന്നു. വിമാനത്തിനുള്ളില്‍ അട്ടിശ്രമമോ റാഞ്ചല്‍ ശ്രമമോ നടന്നിട്ടുണ്ടാകാമെന്ന ആശങ്കയാണ് വിവിധ കോണുകളില്‍ നിന്ന് ഉയരുന്നത്.

വിമാനത്തിന്റെ കോക്ക്പിറ്റില്‍ ജീവനക്കാര്‍ തമ്മിലുണ്ടായ കയ്യാങ്കളിക്കിടെ പൈലറ്റിന് കുത്തേറ്റതായും അദ്ദേഹത്തിന് ഗുരുതരമായി പരിക്കേറ്റതായും ഇസ്രായേല്‍ മാധ്യമങ്ങള്‍ റിപ്പോര്‍ട്ട് ചെയ്തു. പ്രാദേശിക സമയം രാവിലെ 9 മണിയോടെ വിമാനം അടിയന്തര സാഹചര്യത്തെ സൂചിപ്പിക്കുന്ന 'സ്‌ക്വാക്ക് കോഡ് 7700' സന്ദേശം നല്‍കി. തൊട്ടുപിന്നാലെ, വിമാനം റാഞ്ചപ്പെട്ടുവെന്ന് സൂചിപ്പിക്കുന്ന 'കോഡ് 7500' പൈലറ്റ് ആക്ടിവേറ്റ് ചെയ്തതായി അധികൃതര്‍ വ്യക്തമാക്കി.

സംഭവത്തെ തുടര്‍ന്ന് ഇസ്രായേല്‍ പ്രധാനമന്ത്രിയും പ്രതിരോധ മന്ത്രിയും അടിയന്തര സുരക്ഷാ യോഗം ചേര്‍ന്നു. രണ്ട് ഇസ്രായേല്‍ യുദ്ധവിമാനങ്ങളുടെ അകമ്പടിയോടെ വിമാനം സൗദി അറേബ്യയിലേക്ക് തിരിച്ചുവിട്ടതായി പിന്നീട് റിപ്പോര്‍ട്ടുകള്‍ പുറത്തുവന്നു.

ദുബായ് ഇന്റര്‍നാഷണല്‍ എയര്‍പോര്‍ട്ടില്‍ (DXB) നിന്ന് ബെന്‍ ഗുരിയോണ്‍ ഇന്റര്‍നാഷണല്‍ എയര്‍പോര്‍ട്ടിലേക്ക് (TLV) പുറപ്പെട്ട FZ 1073 വിമാനത്തിന് യാത്രാമധ്യേ അപ്രതീക്ഷിത സംഭവവികാസങ്ങള്‍ നേരിട്ടതായി ഫ്‌ലൈദുബായ് ഔദ്യോഗിക പ്രസ്താവനയില്‍ സ്ഥിരീകരിച്ചു. വിമാനം സൗദിയിലെ തബൂക്ക് എയര്‍പോര്‍ട്ടില്‍ സുരക്ഷിതമായി ലാന്‍ഡ് ചെയ്തതായും എല്ലാ യാത്രക്കാരും സുരക്ഷിതരാണെന്നും എയര്‍പോര്‍ട്ട് അധികൃതര്‍ അറിയിച്ചു.

കോക്ക്പിറ്റില്‍ രക്തക്കറ കണ്ടതായി യാത്രക്കാരെ ഉദ്ധരിച്ച് ഇസ്രായേല്‍ മാധ്യമങ്ങള്‍ റിപ്പോര്‍ട്ട് ചെയ്തു. വിമാനത്തിനുള്ളില്‍ യാത്രക്കാര്‍ ഭയന്നുവിറക്കുന്ന ദൃശ്യങ്ങള്‍ സമൂഹമാധ്യമങ്ങളില്‍ പ്രചരിക്കുന്നുണ്ട്. കത്തി കൈയിലേന്തിയ ഒരാള്‍ പൈലറ്റുമാരില്‍ ഒരാളെ തള്ളിയിടുന്നത് കണ്ടതായി ഒരു യാത്രക്കാരന്‍ റോയിട്ടേഴ്‌സിനോട് പറഞ്ഞു.

'കുറച്ചുനിമിഷങ്ങളോളം ഞങ്ങള്‍ കൊല്ലപ്പെടുകയോ വിമാനം തകര്‍ന്നുവീഴുകയോ ചെയ്യുമെന്ന് ഉറപ്പിച്ചു. കോക്ക്പിറ്റില്‍ നിന്ന് നിലവിളി ശബ്ദങ്ങള്‍ കേള്‍ക്കാമായിരുന്നു. ഒടുവില്‍ ഇസ്രായേലി യാത്രക്കാര്‍ ചേര്‍ന്ന് അക്രമിയെ കീഴ്‌പ്പെടുത്തി നിലത്തുറപ്പിച്ചു,' ഒരു യാത്രക്കാരന്‍ പറഞ്ഞു.

ഇത് ഒരു ഭീകരാക്രമണ ശ്രമമാണെന്ന് ഇസ്രായേല്‍ ദേശീയ സുരക്ഷാ മന്ത്രി ഇറ്റമാര്‍ ബെന്‍ ഗ്വിര്‍ പ്രതികരിച്ചു. വിമാനത്തിലുണ്ടായിരുന്ന 180 ഇസ്രായേലികളെ കൊലപ്പെടുത്താന്‍ പദ്ധതിയിട്ട ഭീകരനാണ് ഇതിനു പിന്നിലെന്ന് അദ്ദേഹം പ്രസ്താവനയില്‍ ആരോപിച്ചു. സംഭവത്തെക്കുറിച്ചുള്ള കൂടുതല്‍ വിവരങ്ങള്‍ക്കായി അന്വേഷണം പുരോഗമിക്കുകയാണ്.