ജിദ്ദ: കേരള സര്‍ക്കാരിന്റെ ലഹരി വിരുദ്ധ പ്രവര്‍ത്തനങ്ങള്‍ക്ക് ഐക്യദാര്‍ഢ്യം പ്രഖ്യാപിച്ച് ഐ.സി.എഫ് നേതൃത്വത്തില്‍ ജിദ്ദയില്‍ വിപുലമായ ലഹരി വിരുദ്ധ പ്രതിജ്ഞാ കാമ്പയിന്‍ സംഘടിപ്പിച്ചു. 'Love Life, No Drugs' എന്ന സന്ദേശവുമായി സംഘടിപ്പിച്ച കാമ്പയിന്റെ ഭാഗമായി ജിദ്ദയിലെ വിവിധ കേന്ദ്രങ്ങളില്‍ ലഹരി വിരുദ്ധ പ്രതിജ്ഞ ചൊല്ലി. വിവിധ പരിപാടികളിലായി ആയിരക്കണക്കിന് പ്രവാസികള്‍ കാമ്പയിന്റെ ഭാഗമായി. നാഷണല്‍, ചാപ്റ്റര്‍, റീജിയന്‍, ഡിവിഷന്‍ തുടങ്ങിയ വിവിധ ഘടകങ്ങളിലെ നേതാക്കള്‍ പരിപാടികള്‍ക്ക് നേതൃത്വം നല്‍കി.
ലഹരിയുടെ ദൂഷ്യഫലങ്ങളെക്കുറിച്ച് പൊതുജനങ്ങളില്‍ അവബോധം സൃഷ്ടിക്കുകയും ലഹരി ഉപയോഗത്തിനെതിരെ വ്യക്തിപരവും സാമൂഹികവുമായ പ്രതിരോധം ശക്തിപ്പെടുത്തുകയും ചെയ്യുക എന്ന ലക്ഷ്യത്തോടെയാണ് കാമ്പയിന്‍ സംഘടിപ്പിച്ചത്.
ജിദ്ദ റീജിയന്‍ കേന്ദ്രത്തില്‍ നടന്ന പരിപാടിയില്‍ സയ്യിദ് സൈനുല്‍ ആബിദീന്‍ തങ്ങള്‍ പ്രതിജ്ഞ ചൊല്ലിക്കൊടുത്തു. ബഷീര്‍ മാസ്റ്റര്‍ പറവൂര്‍, യഹ്യ ഖലീല്‍ നൂറാനി, ഹസ്സന്‍ സഖാഫി എന്നിവര്‍ സംസാരിച്ചു.
ലഹരിയുടെ വിവിധ രൂപങ്ങളെ ജീവിതത്തില്‍ നിന്ന് അകറ്റിനിര്‍ത്താനും സ്വന്തം തലമുറയെ ലഹരിയില്‍ നിന്ന് സംരക്ഷിക്കാനും പ്രതിജ്ഞയില്‍ ആഹ്വാനം ചെയ്തു. ആഘോഷങ്ങള്‍, സൗഹൃദം, സമ്മര്‍ദ്ദം തുടങ്ങിയ കാരണങ്ങളാല്‍ പോലും ലഹരിയിലേക്ക് ആദ്യ ചുവടുവെക്കാതിരിക്കാനുള്ള വ്യക്തിപരമായ ഉത്തരവാദിത്തവും പ്രതിജ്ഞ ഓര്‍മ്മിപ്പിച്ചു.
ലഹരി വിരുദ്ധ പ്രവര്‍ത്തനങ്ങള്‍ക്ക് അതിര്‍ത്തികള്‍ ബാധകമല്ലെന്നും പ്രവാസി സമൂഹത്തിനും ഈ ബോധവല്‍ക്കരണ പ്രവര്‍ത്തനങ്ങളില്‍ പങ്കാളികളാകാനാകുമെന്നും പരിപാടികളില്‍ സംസാരിച്ച നേതാക്കള്‍ പറഞ്ഞു. കേരള സര്‍ക്കാരിന്റെ ലഹരി വിരുദ്ധ പ്രവര്‍ത്തനങ്ങള്‍ക്ക് പ്രവാസി സമൂഹത്തിന്റെ പിന്തുണയും ഐക്യദാര്‍ഢ്യവും അറിയിക്കുന്നതിന്റെ ഭാഗമായാണ് കാമ്പയിന്‍ സംഘടിപ്പിച്ചതെന്നും സംഘാടകര്‍ അറിയിച്ചു.
Related News
