ഒരു നാടിന്റെ സ്പന്ദനങ്ങളും വികസനവഴികളും ലോകത്തിന് മുന്നില്‍ തുറന്നുകാട്ടുക. അതിനായി ക്യാമറയും കയ്യിലേന്തി ഇരുപതോളം രാജ്യങ്ങളില്‍ നിന്നുള്ള 35 വ്‌ലോഗര്‍മാര്‍ ദൈവത്തിന്റെ സ്വന്തം നാട്ടിലെത്തി. കേന്ദ്ര വിദേശകാര്യ മന്ത്രാലയത്തിന്റെ പ്രത്യേക ക്ഷണപ്രകാരം കേരളത്തിലെത്തിയ ഈ യാത്രാപ്രേമി സംഘത്തിന്റെ കൊച്ചി സന്ദര്‍ശനം വിസ്മയകരമായ ഒരു അനുഭവമായി മാറി.
സൗദി അറേബ്യ, ബലാറസ്, ബ്രസീല്‍, ചൈന, ഈജിപ്റ്റ്, റഷ്യ, ദക്ഷിണാഫ്രിക്ക തുടങ്ങി ലോകത്തിന്റെ വിവിധ കോണുകളില്‍ നിന്നുള്ള ഈ ഡിജിറ്റല്‍ സ്രഷ്ടാക്കള്‍ കൊച്ചിയുടെ ചരിത്രവും സംസ്‌കാരവും തങ്ങളുടെ ക്യാമറക്കണ്ണുകളിലൂടെ ഒപ്പിയെടുത്തു. ലെ മെറിഡിയന്‍ ഹോട്ടലിലെ രുചികരമായ പ്രഭാതഭക്ഷണത്തിന് ശേഷമായിരുന്നു സംഘത്തിന്റെ പൈതൃകയാത്രയ്ക്ക് തുടക്കമായത്.
കൊച്ചിയുടെ മണ്ണിലേക്ക് കാലുകുത്തിയ വ്‌ലോഗര്‍മാരെ ഏറ്റവും കൂടുതല്‍ ആകര്‍ഷിച്ചത് ഫോര്‍ട്ട് കൊച്ചിയുടെ പൗരാണികതയായിരുന്നു. നൂറ്റാണ്ടുകളുടെ ചരിത്രം ഉറങ്ങുന്ന തെരുവുകളിലൂടെയും പഴയ കെട്ടിടങ്ങള്‍ക്കിടയിലൂടെയും അവര്‍ നടന്നു. ഇതിനിടയിലാണ് സഞ്ചാരികളെ വിസ്മയിപ്പിച്ചുകൊണ്ട് പരമ്പരാഗത മത്സ്യബന്ധന രീതിയായ ചീനവലകള്‍ അവരുടെ മുന്നിലെത്തിയത്. കടലമ്മയുടെ മടിയില്‍ വിരിച്ച വിസ്മയം പോലെ നിവര്‍ന്നുനില്‍ക്കുന്ന ചീനവലകളുടെ പ്രവര്‍ത്തനം അവര്‍ക്ക് തികച്ചും നവീനമായൊരു അനുഭവമായി. വെറുതെ നോക്കിനില്‍ക്കാന്‍ തോന്നിയില്ല; ഓരോരുത്തരായി ചീനവല വലിച്ച് മത്സ്യം പിടിക്കുന്ന വിദ്യയും നേരിട്ട് പരീക്ഷിച്ചുനോക്കി, ക്യാമറയില്‍ ആ നിമിഷങ്ങള്‍ പകര്‍ത്തി.
ചരിത്രത്തിന്റെ ശേഷിപ്പുകള്‍ ഉറങ്ങുന്ന മട്ടാഞ്ചേരിയിലൂടെയുള്ള കറക്കത്തിന് ശേഷം കൊച്ചിയുടെ ആധുനിക മുഖമായ വാട്ടര്‍ മെട്രോയിലായിരുന്നു അടുത്ത യാത്ര. കായലിലൂടെയുള്ള ആ സങ്കടമില്ലാത്ത ജലയാത്ര വ്‌ലോഗര്‍മാരുടെ മനംകവര്‍ന്നു. ഹൈക്കോടതി വാട്ടര്‍ മെട്രോ ജട്ടിയില്‍ വന്ന് ഇറങ്ങിയ സംഘം, കൊച്ചിയുടെ കാഴ്ചകളുടെ മാസ്മരികത മനസ്സില്‍ സൂക്ഷിച്ചുകൊണ്ട് സ്വന്തം നാടുകളിലേക്ക് മടങ്ങി്; തങ്ങളുടെ ലക്ഷ്യസ്ഥാനമായ കൊച്ചിയുടെ കഥകള്‍ ലോകത്തോട് പറയാന്‍.
.jpg)
