ലണ്ടന്‍: തമിഴ്‌നാട് മുഖ്യമന്ത്രി വിജയിയെ കാണാന്‍ നൂറുകണക്കിന് ആരാധകര്‍ ഇരച്ചെത്തിയതോടെ ലണ്ടനില്‍ നിശ്ചയിച്ച പൊതുപരിപാടി സുരക്ഷാ കാരണങ്ങളാല്‍ റദ്ദാക്കി. ലണ്ടന്‍ സന്ദര്‍ശനത്തിനിടെ ദ ഷാര്‍ഡ് കെട്ടിടത്തിന് സമീപം നടത്താനിരുന്ന പൊതുപരിപാടിക്ക് ജനക്കൂട്ടത്തിന്റെ സുരക്ഷ സംബന്ധിച്ച ആശങ്കയെ തുടര്‍ന്നാണ് അധികൃതര്‍ അനുമതി നിഷധിച്ചത്. വിജയിയെ കാണാനായി നൂറുകണക്കിന് ആരാധകര്‍ മണിക്കൂറുകളോളം സ്ഥലത്ത് കാത്തുനിന്നിരുന്നു.
യു.കെയിലെ ഏറ്റവും ഉയരം കൂടിയ കെട്ടിടമായ ദ ഷാര്‍ഡിന് സമീപമാണ് ആരാധകര്‍ ഒത്തുകൂടിയത്. വിജയിയുടെ യൂറോപ്പ് സന്ദര്‍ശനത്തിന്റെ ഭാഗമായി അദ്ദേഹത്തെ നേരില്‍ കാണാമെന്ന പ്രതീക്ഷയില്‍ പലരും ഏറെ നേരത്തെ തന്നെ സ്ഥലത്തെത്തിയിരുന്നു. പരിപാടി നടക്കില്ലെന്ന് സംഘാടകര്‍ അറിയിച്ചതോടെ ആരാധകര്‍ക്കിടയില്‍ നിരാശ പടര്‍ന്നു.
വിജയ് സംഘത്തിലെ ഒരാള്‍ ലൗഡ് സ്പീക്കറിലൂടെ ജനക്കൂട്ടത്തെ അഭിസംബോധന ചെയ്താണ് പരിപാടി റദ്ദാക്കിയ വിവരം അറിയിച്ചത്. ആവശ്യമായ അനുമതി നേടാന്‍ കഴിഞ്ഞില്ലെന്നും ജനക്കൂട്ടത്തിന്റെ സുരക്ഷ സംബന്ധിച്ച് പൊലീസിന് ആശങ്കയുണ്ടായിരുന്നുവെന്നുമാണ് വിശദീകരണം.
തമിഴ്‌നാട്ടില്‍ സാധാരണ കാണുന്ന തരത്തിലുള്ള വലിയ ജനക്കൂട്ടമാണ് ലണ്ടനിലും വിജയിയെ കാണാന്‍ എത്തിയതെന്ന് ഒരു ആരാധകന്‍ പ്രതികരിച്ചതായി പി.ടി.ഐ റിപ്പോര്‍ട്ട് ചെയ്തു. ചിലര്‍ ഏറെ ദൂരം യാത്ര ചെയ്താണ് പരിപാടിക്കായി എത്തിയിരുന്നത്.
വിജയിയുടെ ലണ്ടന്‍ സന്ദര്‍ശനത്തിന്റെ പ്രധാന ലക്ഷ്യം നിക്ഷേപ സമാഹരണമാണ്. തമിഴ്‌നാട് സര്‍ക്കാരിന്റെ നിക്ഷേപ പ്രചാരണ ദൗത്യത്തിന് നേതൃത്വം നല്‍കിയാണ് മുഖ്യമന്ത്രി യുകെയിലെത്തിയത്. ആഗോള നിക്ഷേപകരെ സംസ്ഥാനത്തേക്ക് ആകര്‍ഷിക്കുകയാണ് ദൗത്യത്തിന്റെ ലക്ഷ്യം.
മുഖ്യമന്ത്രിയുടെ ഓഫീസ് പുറത്തുവിട്ട വിവരങ്ങള്‍ പ്രകാരം യുകെ സന്ദര്‍ശനത്തിനിടെ വിവിധ കമ്പനികളുമായി നിരവധി ധാരണാപത്രങ്ങളില്‍ ഒപ്പുവച്ചു. ഏകദേശം 12,300 കോടി രൂപയുടെ നിക്ഷേപം ഇതിലൂടെ സംസ്ഥാനത്തേക്ക് എത്തുമെന്നാണ് സര്‍ക്കാര്‍ പറയുന്നത്.
ഈ നിക്ഷേപങ്ങള്‍ ഏഷ്യയിലെ പ്രധാന അഡ്വാന്‍സ്ഡ് മാനുഫാക്ചറിങ്, ടെക്‌നോളജി ഹബ്ബായി തമിഴ്‌നാടിനെ വളര്‍ത്താനുള്ള സംസ്ഥാനത്തിന്റെ ശ്രമങ്ങള്‍ക്ക് സഹായകമാകുമെന്നാണ് വിലയിരുത്തല്‍. പദ്ധതികള്‍ യാഥാര്‍ഥ്യമാകുന്നതോടെ 9,400ലേറെ തൊഴിലവസരങ്ങള്‍ സൃഷ്ടിക്കപ്പെടുമെന്നും സര്‍ക്കാര്‍ അറിയിച്ചു.
യുകെ സന്ദര്‍ശനം പൂര്‍ത്തിയാക്കി ഇന്ന് മുഖ്യമന്ത്രി ഇന്ത്യയിലേക്ക് മടങ്ങുമെന്നാണ് പ്രതീക്ഷിക്കുന്നത്.
.jpg)
Related News
