ദുബായ്: ഇറാനുമായി ചര്‍ച്ചകള്‍ നടത്താന്‍ താന്‍ സന്നദ്ധനാണെന്ന് യുഎസ് പ്രസിഡന്റ് ഡൊണാള്‍ഡ് ട്രംപ് വ്യക്തമാക്കി. ടെഹ്റാനുമായുള്ള കരാറിന് ഇനിയും സമയമായിട്ടില്ലെന്ന് ആഴ്ചകളോളം നിലപാടെടുത്ത ശേഷമാണ് ട്രംപിന്റെ ഈ പുതിയ പ്രസ്താവന. 'പരാജയപ്പെട്ട ഇറാന്‍ രാഷ്ട്രത്തിന് പെട്ടെന്ന് തന്നെ ഒരു കരാറിലെത്തണം. യുണൈറ്റഡ് സ്റ്റേറ്റ്‌സ് ചര്‍ച്ചകളില്‍ ഏര്‍പ്പെടുമോ എന്ന് ഞങ്ങള്‍ തീരുമാനിക്കും ഞങ്ങള്‍ അതിന് തയ്യാറാണ്,' ട്രംപ് ട്രൂത്ത് സോഷ്യലില്‍ കുറിച്ചു.

ഗള്‍ഫ് അറബ് രാജ്യങ്ങള്‍ ഇറാനുമായി നടത്താനിരുന്ന യോഗം മാറ്റിവെച്ചതിന് പിന്നാലെയാണ് അദ്ദേഹത്തിന്റെ പ്രതികരണം വന്നിരിക്കുന്നത്. ഫെബ്രുവരി അവസാനം യുഎസും ഇസ്രായേലും ഇറാനെ ആക്രമിച്ചതിനെത്തുടര്‍ന്ന് ലോകത്തെ ഏറ്റവും പ്രധാനപ്പെട്ട എണ്ണക്കപ്പല്‍ പാതയായ ഹോര്‍മുസ് കടലിടുക്ക് വലിയതോതില്‍ അടഞ്ഞുകിടക്കുകയാണ്. ഇത് വീണ്ടും തുറക്കുന്നതിനുള്ള ചര്‍ച്ചകള്‍ക്കായി ഒമാന്റെ ആതിഥേയത്വത്തില്‍ തിങ്കളാഴ്ച നടക്കേണ്ടിയിരുന്ന ഗള്‍ഫ് രാജ്യങ്ങളുടെയും ഇറാന്റെയും യോഗമാണ് മാറ്റിവെച്ചത്.

അതേസമയം, ഹോര്‍മുസ് കടലിടുക്കില്‍ തങ്ങളുടെ പ്രവര്‍ത്തന മാര്‍ഗ്ഗനിര്‍ദ്ദേശങ്ങള്‍ ലംഘിച്ച 77 കപ്പലുകളുടെ പട്ടിക ഇറാന്‍ പുറത്തുവിട്ടു. ഭാവിയില്‍ ഈ പാതയിലൂടെ യാത്ര ചെയ്യുമ്പോള്‍ ഇത്തരം കപ്പലുകള്‍ക്ക് പിഴയോ തടഞ്ഞുവെക്കലോ കണ്ടുകെട്ടലോ നേരിടേണ്ടിവരുമെന്ന് ഇറാന്‍ മുന്നറിയിപ്പ് നല്‍കി.

യുഎസിന്റെ പിന്തുണയോടെ രഹസ്യമായി കടലിടുക്ക് മുറിച്ചുകടക്കുന്ന കപ്പലുകളുടെ ശരാശരി എണ്ണം വര്‍ദ്ധിച്ചുകൊണ്ടിരിക്കുകയാണെന്ന് യുഎസ് ഊര്‍ജ സെക്രട്ടറി ക്രിസ് റൈറ്റ് പറഞ്ഞു. എന്നാല്‍ ആഗസ്റ്റ് മാസത്തിന് ശേഷം വീണ്ടും സംഘര്‍ഷം രൂക്ഷമായതിനെത്തുടര്‍ന്ന് ഈ മാസം എണ്ണ കയറ്റുമതി കുറഞ്ഞതായി സ്വതന്ത്ര നിരീക്ഷകര്‍ വ്യക്തമാക്കി.