ദുബായ്: 2026-ലെ ഏറ്റവും പുതിയ റിപ്പോര്‍ട്ട് പ്രകാരം ലോകത്തിലെ ഏറ്റവും ശക്തമായ പാസ്പോര്‍ട്ടെന്ന പദവി യു.എ.ഇ. പാസ്പോര്‍ട്ട് നിലനിര്‍ത്തി. ലോകമെമ്പാടുമുള്ള 182 രാജ്യങ്ങളിലേക്ക് ലളിതമായ യാത്രാസൗകര്യമാണ് യു.എ.ഇ. പാസ്പോര്‍ട്ട് ഉടമകള്‍ക്ക് ലഭിക്കുന്നത്.
'പാസ്പോര്‍ട്ട് റിപ്പോര്‍ട്ട്‌സ്' സെപ്റ്റംബര്‍ മാസത്തില്‍ പുറത്തുവിട്ട റിപ്പോര്‍ട്ടിലാണ് ഈ വിവരമുള്ളത്. 182-ന്റെ മൊബിലിറ്റി സ്‌കോറാണ് യു.എ.ഇ. കരസ്ഥമാക്കിയത്. ഇത് ലോകമെമ്പാടുമുള്ള 91.9 ശതമാനം യാത്രാ പ്രവേശനത്തിന് തുല്യമാണ്. മുന്‍കൂര്‍ വിസ ഇല്ലാതെ, ഓണ്‍-എറൈവല്‍ വിസയിലൂടെയോ മറ്റ് ലളിതമായ സംവിധാനങ്ങളിലൂടെയോ, അല്ലെങ്കില്‍ ഇലക്ട്രോണിക് ട്രാവല്‍ ഓതറൈസേഷന്‍ (ഇ.ടി.എ) വഴിയോ പ്രവേശിക്കാന്‍ കഴിയുന്ന രാജ്യങ്ങളെയാണ് ഈ സ്‌കോറില്‍ ഉള്‍പ്പെടുത്തിയിരിക്കുന്നത്.
യാത്രാ സൗകര്യങ്ങളുടെ കണക്കുകള്‍:
യു.എ.ഇ.യുടെ മൊബിലിറ്റി സ്‌കോറില്‍ ഉള്‍പ്പെടുന്ന 182 ലക്ഷ്യസ്ഥാനങ്ങളില്‍ 128 എണ്ണത്തിലും വിസ രഹിത പ്രവേശനം സാധ്യമാണ്. 44 രാജ്യങ്ങളില്‍ ഓണ്‍-എറൈവല്‍ വിസയോ മറ്റ് ലളിതമായ പ്രവേശന സംവിധാനങ്ങളോ ലഭ്യമാണ്. 10 രാജ്യങ്ങളിലേക്ക് പ്രവേശിക്കാന്‍ ഇലക്ട്രോണിക് ട്രാവല്‍ ഓതറൈസേഷന്‍ ആവശ്യമാണ്.
അഫ്ഗാനിസ്ഥാന്‍, അമേരിക്ക, ഓസ്ട്രേലിയ, ബെലീസ്, ഭൂട്ടാന്‍, അള്‍ജീരിയ, എറിത്രിയ, കാമറൂണ്‍, ഉത്തര കൊറിയ, ലെസോത്തോ, ലിബിയ, മ്യാന്‍മര്‍, നിക്കരാഗ്വ, സൊമാലിയ, തുര്‍ക്‌മെനിസ്ഥാന്‍, വെനസ്വേല എന്നീ 16 രാജ്യങ്ങളിലേക്ക് മാത്രമാണ് യു.എ.ഇ. പൗരന്മാര്‍ക്ക് നിലവില്‍ വിസ ആവശ്യമായി വരുന്നത്.
യൂറോപ്പിലും ഗള്‍ഫിലും സമ്പൂര്‍ണ്ണ പ്രവേശനം
യൂറോപ്പിലെ 46 രാജ്യങ്ങളിലേക്കും വിസ രഹിത പ്രവേശനം ഉള്‍പ്പെടെ 100 ശതമാനം പ്രവേശനക്ഷമത യു.എ.ഇ. പാസ്പോര്‍ട്ട് ഉറപ്പാക്കുന്നുണ്ട്. ഗള്‍ഫ് രാജ്യങ്ങളായ ബഹ്റൈന്‍, ഖത്തര്‍, കുവൈറ്റ്, സൗദി അറേബ്യ, ഒമാന്‍ എന്നിവിടങ്ങളിലേക്കും യു.എ.ഇ. പൗരന്മാര്‍ക്ക് വിസയില്ലാതെ യാത്ര ചെയ്യാം.
കൂടാതെ ഏഷ്യയിലെ 50 രാജ്യങ്ങള്‍, 17 മിഡില്‍ ഈസ്റ്റ് രാജ്യങ്ങള്‍, 6 ഗള്‍ഫ് രാജ്യങ്ങള്‍, അറബി ഔദ്യോഗിക ഭാഷയായ 24 രാജ്യങ്ങള്‍ എന്നിവയിലും യു.എ.ഇ. പാസ്പോര്‍ട്ട് ഒന്നാം സ്ഥാനത്താണ്. ലോക വ്യാപാര സംഘടനയിലെ 159 അംഗങ്ങള്‍, ഒ.ഐ.സി. രാജ്യങ്ങള്‍, അറബ് ലീഗ് അംഗങ്ങള്‍ എന്നിവര്‍ക്കിടയിലും യു.എ.ഇ. തന്നെയാണ് മുന്നില്‍.
മൊബിലിറ്റി സ്‌കോറിന്റെ അടിസ്ഥാനത്തിലാണ് പാസ്പോര്‍ട്ട് റിപ്പോര്‍ട്ട്‌സ് റാങ്കിംഗ് നിര്‍ണയിക്കുന്നത്. തുല്യ സ്‌കോര്‍ വരുന്ന ഘട്ടങ്ങളില്‍ വിസ രഹിത ലക്ഷ്യസ്ഥാനങ്ങളുടെ എണ്ണത്തിന്റെ അടിസ്ഥാനത്തിലാണ് മുന്‍ഗണന നല്‍കുന്നത്.
.jpg)
