മുംബൈ: ബോളിവുഡ് താരം ഷാരൂഖ് ഖാന്റെ മുംബൈ ബാന്ദ്രയിലെ പ്രശസ്തമായ 'മന്നത്ത്' ബംഗ്ലാവില്‍ പാമ്പുകളെ കണ്ടെത്തി. കഴിഞ്ഞ ദിവസം വൈകുന്നേരത്തോടെയാണ് ബംഗ്ലാവിന്റെ പുല്‍ത്തകിടിയില്‍ രണ്ട് പാമ്പുകളെ സുരക്ഷാ ജീവനക്കാര്‍ കണ്ടത്. തുടര്‍ന്ന് പാമ്പ് പിടിത്തക്കാരെ വിവരമറിയിക്കുകയായിരുന്നു.
രാത്രി എട്ടു മണിയോടെ സ്ഥലത്തെത്തിയ റെസ്‌ക്യൂ ടീം നടത്തിയ തെരച്ചിലില്‍, ഏണിക്ക് അടിയില്‍ ഒളിച്ചിരുന്ന എട്ടടി നീളമുള്ള ഒരു പാമ്പിനെ സുരക്ഷിതമായി പിടികൂടി. പിടിയിലായത് വിഷമില്ലാത്ത ഇനത്തില്‍പ്പെട്ട ചേര (ഇന്ത്യന്‍ റാറ്റ് സ്‌നേക്ക്) ആണെന്ന് പാമ്പ് പിടിത്തക്കാര്‍ സ്ഥിരീകരിച്ചു. ഇതോടെ ബംഗ്ലാവിലെ ജീവനക്കാരും സുരക്ഷാ ഉദ്യോഗസ്ഥരും ആശ്വാസത്തിലായി. എന്നാല്‍ തെരച്ചിലിനിടെ ബഹളം കേട്ട് രണ്ടാമത്തെ പാമ്പ് രക്ഷപ്പെട്ടു. വൈകിട്ട് വൈകിയും തെരച്ചില്‍ തുടര്‍ന്നുവെങ്കിലും ഇതിനെ കണ്ടെത്താനായില്ല.
ബാന്ദ്ര ലാന്‍ഡ്സ് എന്‍ഡിലുള്ള ഷാരൂഖിന്റെ കടലഭിമുഖമായ 'മന്നത്ത്' മുംബൈയിലെ പ്രധാന ആകര്‍ഷണ കേന്ദ്രങ്ങളിലൊന്നാണ്. മന്നത്തില്‍ നവീകരണ പ്രവര്‍ത്തനങ്ങള്‍ നടക്കുന്നതിനാല്‍ ഷാറുഖ് ഖാനും കുടുംബവും പാലി ഹില്‍ ഏരിയയിലെ ആഡംബര അപാര്‍ട്ട്‌മെന്റിലാണ് താമസം. 2025 മെയ് മാസത്തിലാണ് ഇവിടെ നവീകരണ പ്രവര്‍ത്തനങ്ങള്‍ ആരംഭിച്ചത്. സിദ്ധാര്‍ത്ഥ് ആനന്ദ് സംവിധാനം ചെയ്യുന്ന 'കിംഗ്' എന്ന ചിത്രത്തിന്റെ തിരക്കുകളിലാണ് താരം. ദീപിക പദുകോണ്‍, അഭിഷേക് ബച്ചന്‍, സുഹാന ഖാന്‍, രാഘവ് ജുയാല്‍, റാണി മുഖര്‍ജി എന്നിവരാണ് ചിത്രത്തിലെ മറ്റ് പ്രധാന താരങ്ങള്‍. 2026 ഡിസംബര്‍ 24-നാണ് ചിത്രം തിയേറ്ററുകളില്‍ എത്തുന്നത്.
.jpg)
Related News
