തിരുവനന്തപുരം: പ്രവാസി ക്ഷേമ ബോര്ഡിന്റെ പ്രവര്ത്തനങ്ങള് വിപുലമാക്കുന്നതിനും പെന്ഷന് പദ്ധതിയിലെ അംശദായം കുടിശ്ശികയാകാതെ ബോര്ഡിന് ലഭ്യമാക്കുന്നതിനും ഓരോ ബ്ലോക്കിലും പ്രവാസി ബോര്ഡ് പ്രൊമോട്ടര്മാരെ നിയമിക്കണമെന്ന് പ്രവാസി ലീഗ് ആവശ്യപ്പെട്ടു. തിരുവനന്തപുരം നോര്ക്ക സെന്ററില് നോര്ക്ക ഡയറക്ടര് ആസിഫ് യൂസഫും പ്രവാസി ബോര്ഡ് സി.ഇ.ഒ. നജീബും ചേര്ന്ന് വിളിച്ചുചേര്ത്ത സംഘടന പ്രതിനിധികളുടെ യോഗത്തിലാണ് ഈ ആവശ്യം ഉന്നയിച്ചത്.
അടയ്ക്കാതെ മുടങ്ങിക്കിടക്കുന്ന അംശദായ തുക 625 കോടി രൂപയാണെന്നും ഇത് സമയബന്ധിതമായി അടയ്ക്കുന്നതിന് പ്രാദേശികമായി അദാലത്തുകള് സംഘടിപ്പിക്കുക, ഇളവുകള് അനുവദിക്കുക, ബാങ്ക് വഴി തുക ലഭിക്കുന്നതിന് ഓട്ടോ ഡെബിറ്റ്, സ്റ്റാന്ഡിങ് ഇന്സ്ട്രക്ഷന് സംവിധാനങ്ങള് ക്രമീകരിക്കുക തുടങ്ങിയ നിര്ദേശങ്ങള് യോഗത്തില് മുന്നോട്ടുവെച്ചു.
പ്രവാസി, സ്വദേശി സ്ഥാപനങ്ങളില് നിന്ന് സി.എസ്.ആര്. ഫണ്ട് ലഭ്യമാക്കുക, 2% മാത്രമുള്ള സര്ക്കാര് വിഹിതം വര്ധിപ്പിക്കുക, കിഫ്ബി നിക്ഷേപ ഡിവിഡന്റ് പ്രവാസി പെന്ഷന് ഫണ്ടില് നിന്ന് നല്കുന്നത് ഒഴിവാക്കുക തുടങ്ങിയ നിര്ദേശങ്ങളും മുന്നോട്ടു വെച്ചു. പുതിയ അംഗങ്ങളെ ചേര്ക്കുന്നതിന് ക്യാമ്പയിന് സംഘടിപ്പിക്കുക, 60 വയസ്സ് കഴിഞ്ഞ പ്രവാസികള്ക്ക് അംഗത്വം നല്കുക, അതിനായി 6 മാസം പൊതുമാപ്പ് കാലാവധി നിശ്ചയിക്കുക. ഓണ്ലൈന്, ഒ.ടി.പി. സംവിധാനങ്ങളിലെ സാങ്കേതിക പ്രശ്നങ്ങള് പരിഹരിച്ച് പ്രക്രിയ ലളിതമാക്കുക, തദ്ദേശ സ്ഥാപനങ്ങളില് പ്രവാസി കാര്യ സ്റ്റാന്ഡിങ് കമ്മിറ്റിയും പ്രവാസി വര്ക്കിംഗ് ഗ്രൂപ്പും രൂപീകരിക്കുക എന്നീ നിര്ദേശങ്ങളും ഉണ്ടായി.
കഴിഞ്ഞ വര്ഷം നടപ്പാക്കിയ പെന്ഷന് അര്ഹത ഭേദഗതി നിരവധി പേരുടെ അംഗത്വം നഷ്ടപ്പെടുത്തുന്നതിനാല് അത് പിന്വലിക്കണണമെന്ന് ആവശ്യപ്പെട്ടു. നോര്ക്ക കെയര് മെഡിക്കല് ഇന്ഷുറന്സ് പദ്ധതിയില് മുന് പ്രവാസികളെ ഉള്പ്പെടുത്തുകയും ഇന്ഷുറന്സ് ക്ലെയിമുകള് തള്ളിക്കളയുന്നു എന്ന പരാതി അടിയന്തരമായി പരിശോധിച്ച് നടപടി സ്വീകരിക്കുകയും വേണം.
കുടിശ്ശിക ഉള്പ്പെടെയുള്ള അടുത്ത പെന്ഷന് ഓണത്തിന് മുമ്പായി നല്കണമെന്നും പ്രവാസി ലീഗ് ശക്തമായി ആവശ്യപ്പെട്ടു. യോഗത്തിലെ നിര്ദേശങ്ങള് സര്ക്കാരിലും ബോര്ഡിലും ഉന്നയിച്ച് ആവശ്യമായ നടപടികള് ഉടന് ഉണ്ടാകുമെന്ന് നോര്ക്ക അധികൃതര് ഉറപ്പുനല്കി. പ്രവാസി ലീഗ് സംസ്ഥാന പ്രസിഡന്റ് ഹനീഫ മൂന്നിയൂര്, വൈസ് പ്രസിഡന്റുമാരായ പി.എം.എ. ജലീല്, ഉമയനല്ലൂര് ശിഹാബുദ്ദീന് എന്നിവരും മറ്റ് പ്രവാസി സംഘടന നേതാക്കളും യോഗത്തില് പങ്കെടുത്തു.
