ജിദ്ദ: രാജ്യത്തിന്റെ ദേശീയ വിമാനക്കമ്പനിയായ സൗദിയ, എയര്‍ കണക്റ്റിവിറ്റി പ്രോഗ്രാമിന്റെയും സൗദി ടൂറിസം അതോറിറ്റിയുടെയും സഹകരണത്തോടെ ടോക്കിയോയെ തങ്ങളുടെ ആഗോള ശൃംഖലയിലെ പുതിയ അന്താരാഷ്ട്ര ലക്ഷ്യസ്ഥാനമായി പ്രഖ്യാപിച്ചു. റിയാദിലെ കിംഗ് ഖാലിദ് അന്താരാഷ്ട്ര വിമാനത്താവളത്തില്‍ നിന്ന് 2026 നവംബര്‍ മുതല്‍ ആഴ്ചയില്‍ മൂന്ന് സര്‍വീസുകളായിരിക്കും ഈ പുതിയ റൂട്ടില്‍ ഉണ്ടാകുക. പുതിയ റൂട്ടുകള്‍ ആരംഭിച്ചും അന്താരാഷ്ട്ര വിമാന സര്‍വീസുകളുടെ എണ്ണം വര്‍ദ്ധിപ്പിച്ചും ആഗോള വിപണികളുമായുള്ള ബന്ധം ശക്തിപ്പെടുത്തുകയാണ് എയര്‍ കണക്റ്റിവിറ്റി പ്രോഗ്രാമുമായുള്ള സഹകരണത്തിലൂടെ ലക്ഷ്യമിടുന്നതെന്ന് സൗദിയ വ്യക്തമാക്കി.

സൗദി അറേബ്യയും ജപ്പാനും തമ്മിലുള്ള നേരിട്ടുള്ള വിമാന സര്‍വീസുകള്‍ ആരംഭിക്കുന്നത് ഇരു രാജ്യങ്ങളും തമ്മിലുള്ള ടൂറിസവും വാണിജ്യ പ്രവര്‍ത്തനങ്ങളും ശക്തിപ്പെടുത്തുന്നതിനൊപ്പം രാജ്യത്തേക്കുള്ള പ്രവേശനം എളുപ്പമാക്കുകയും ചെയ്യും. സൗദി അറേബ്യയെ പ്രമുഖ ആഗോള ടൂറിസം കേന്ദ്രവും ലോജിസ്റ്റിക്‌സ് ഹബ്ബുമായി മാറ്റുക എന്ന ലക്ഷ്യത്തോടെയുള്ള നാഷണല്‍ ഏവിയേഷന്‍ സ്ട്രാറ്റജി, നാഷണല്‍ ടൂറിസം സ്ട്രാറ്റജി, സൗദി വിഷന്‍ 2030 എന്നിവയുടെ ലക്ഷ്യങ്ങള്‍ക്ക് ഈ പുതിയ റൂട്ട് കരുത്തേകുമെന്നും പ്രസ്താവനയില്‍ പറയുന്നു.

സൗദി അറേബ്യയിലേക്ക് കൂടുതല്‍ സന്ദര്‍ശകരെ ആകര്‍ഷിക്കുന്നതിനായി യാത്രാ പാക്കേജുകളും ലക്ഷ്യസ്ഥാന പ്രൊമോഷനുകളും തയ്യാറാക്കാന്‍ സൗദി ടൂറിസം അതോറിറ്റി ജപ്പാനിലെ പങ്കാളികളുമായും ഏജന്‍സികളുമായും ചേര്‍ന്ന് പ്രവര്‍ത്തിക്കുന്നുണ്ട്. രാജ്യം 2027-ലെ എ.എഫ്.സി ഏഷ്യന്‍ കപ്പിന് (AFC Asian Cup 2027) ആതിഥേയത്വം വഹിക്കുന്നതിന് മുന്നോടിയായാണ് ഈ സുപ്രധാന റൂട്ട് ആരംഭിക്കുന്നത്. ഇത് ജപ്പാനില്‍ നിന്നുള്ള ഫുട്‌ബോള്‍ ആരാധകര്‍ക്കും സന്ദര്‍ശകര്‍ക്കും യാത്ര എളുപ്പമാക്കുന്നതിനും രാജ്യത്തിന്റെ ഒരുക്കങ്ങള്‍ ശക്തിപ്പെടുത്തുന്നതിനും സഹായിക്കും.

പരമ്പരാഗത വ്യോമ ബന്ധങ്ങള്‍ക്കപ്പുറം ടോക്കിയോയുടെ കൂട്ടിച്ചേര്‍ക്കലിന് തന്ത്രപരമായ പ്രാധാന്യമുണ്ടെന്ന് എയര്‍ലൈന്‍ പ്രസ്താവനയില്‍ പറഞ്ഞു. സൗദി അറേബ്യയും ജപ്പാനും തമ്മിലുള്ള വളര്‍ന്നുവരുന്ന ബന്ധത്തിന് പുതിയൊരു പാലം കൂടിയാണ് ഇതുവഴി തുറക്കപ്പെടുന്നത്.

സൗദിയയില്‍ യാത്ര ചെയ്യുന്നവര്‍ക്ക് മികച്ച യാത്രാനുഭവം ഉറപ്പാക്കുന്ന നൂതന ഡിജിറ്റല്‍ സേവനങ്ങളും ലഭ്യമാകും. 153 വിമാനങ്ങളുടെ വലിയ നിരയുടെ പിന്തുണയോടെ നിലവില്‍ നാല് ഭൂഖണ്ഡങ്ങളിലായി നൂറിലധികം ലക്ഷ്യസ്ഥാനങ്ങളിലേക്ക് സൗദിയ സര്‍വീസ് നടത്തുന്നുണ്ട്. കൂടാതെ 112 പുതിയ വിമാനങ്ങള്‍ കൂടി ഉള്‍പ്പെടുത്തിക്കൊണ്ട് വിമാനവ്യൂഹം വിപുലീകരിക്കുന്നതിനുള്ള പ്രവര്‍ത്തനങ്ങളും കമ്പനി മുന്നോട്ട് കൊണ്ടുപോവുകയാണ്.