നജ്റാന്‍: വേനല്‍ക്കാല അവധിക്കാലത്ത് സൗദിയിലെ നജ്റാനിലെ സ്‌പോര്‍ട്‌സ്, ഫിറ്റ്‌നസ് ട്രാക്കുകളിലേക്ക് എല്ലാ പ്രായത്തിലുമുള്ള ജനങ്ങളുടെയും സന്ദര്‍ശകരുടെയും ഒഴുക്ക് വര്‍ദ്ധിക്കുന്നു. നടത്തം പ്രോത്സാഹിപ്പിക്കുന്നതിനും ആരോഗ്യകരമായ ജീവിതശൈലി മെച്ചപ്പെടുത്തുന്നതിനുമായി നജ്റാന്‍ നഗരസഭ നഗരത്തിലും വിവിധ ഗവര്‍ണറേറ്റുകളിലുമായി 44 സ്‌പോര്‍ട്‌സ് ട്രാക്കുകള്‍ വികസിപ്പിച്ചെടുത്തിട്ടുണ്ട്. നഗരസഭയുടെ നഗരസൗന്ദര്യവല്‍ക്കരണ പദ്ധതികളുടെ ഭാഗമായി സജ്ജീകരിച്ചിട്ടുള്ള ഈ ട്രാക്കുകളില്‍ ഫിറ്റ്‌നസ് ഉപകരണങ്ങള്‍, സൈക്ലിംഗ് ലൈനുകള്‍, ആധുനിക ലൈറ്റിംഗ്, വിശ്രമസ്ഥലങ്ങള്‍, പൂന്തോട്ടങ്ങള്‍ എന്നിവ ഒരുക്കിയിട്ടുണ്ട്.
നജ്റാനിലെ കിംഗ് ഫഹദ് പാര്‍ക്കിലെ 2,660 മീറ്റര്‍ നീളവും 10 മീറ്റര്‍ വീതിയുമുള്ള നടത്ത ട്രാക്കിലാണ് ഏറ്റവും കൂടുതല്‍ ആളുകള്‍ എത്തുന്നത്. ഇടതൂര്‍ന്ന മരങ്ങളും വിശാലമായ ഹരിതഭൂമിയും ചുറ്റുമുള്ള ഈ പാര്‍ക്കില്‍ താരതമ്യേന തണുത്ത അന്തരീക്ഷമായതിനാല്‍ വ്യായാമത്തിനും വിനോദത്തിനുമായി നിരവധി കുടുംബങ്ങളും ഫിറ്റ്‌നസ് പ്രേമികളുമാണ് ദിവസേന എത്തുന്നത്. പ്രിന്‍സ് ജലാവു ബിന്‍ അബ്ദുല്‍ അസീസ് പാര്‍ക്കിലെ നടത്ത ട്രാക്കും സമാനമായ സൗകര്യങ്ങളോടെ സന്ദര്‍ശകരെ ആകര്‍ഷിക്കുന്നുണ്ട്.
ആരോഗ്യ സംരക്ഷണത്തെക്കുറിച്ചും ശാരീരിക വ്യായാമങ്ങളുടെ പ്രാധാന്യത്തെക്കുറിച്ചും ജനങ്ങളില്‍ അവബോധം വര്‍ദ്ധിച്ചുവരുന്നതിന്റെ തെളിവാണ് ഈ ട്രാക്കുകളിലെ വലിയ ജനപങ്കാളിത്തമെന്ന് അധികൃതര്‍ വ്യക്തമാക്കി.
.jpg)
Related News
