ഡാലസ്: ലോകകപ്പ് മത്സരത്തില് ഐവറികോസ്റ്റിനെതിരെ നോര്വേയ്ക്ക് ലീഡ്. ആദ്യ പകുതിയുടെ 39-ാം മിനിറ്റില് യുവതാരം അന്റോണിയോ നുസ നേടിയ തകര്പ്പന് ഗോളിലൂടെയാണ് നോര്വേ മുന്നിലെത്തിയത്. മത്സരം ആവേശകരമായ രണ്ടാം പകുതിയില് പുരോഗമിക്കുകയാണ്.
മത്സരത്തിന്റെ തുടക്കത്തില് ഇരുടീമുകളും സാവധാനമാണ് നീങ്ങിയതെങ്കിലും, ഹൈഡ്രേഷന് ബ്രേക്കിന് ശേഷം കളി ആവേശകരമായി. മൂന്നാം മിനിറ്റില് എര്ലിങ് ഹാളണ്ട് തൊടുത്ത ഹെഡര് ഐവറി ഗോള്കീപ്പര് യഹിയ ഫൊഫാന തടഞ്ഞത് നോര്വെയുടെ ആദ്യ മുന്നറിയിപ്പായിരുന്നു. മറുഭാഗത്ത് യാന് ഡിയൊമാന്ഡെയുടെ നേതൃത്വത്തില് ഐവറികോസ്റ്റും ഒത്തിണക്കത്തോടെ പന്ത് തട്ടിയെങ്കിലും ഗോള് മാത്രം അകന്നുനിന്നു.
29-ാം മിനിറ്റില് നിക്കോളാസ് പെപ്പെ നല്കിയ മികച്ചൊരു ക്രോസ് നോര്വേ പ്രതിരോധം തകര്ത്തത് ഐവറികോസ്റ്റിന് വലിയ അവസരമൊരുക്കിയിരുന്നു. എന്നാല് തുടര്ന്നു ലഭിച്ച നാല് കോര്ണര് കിക്കുകളും ഗോളാക്കി മാറ്റാന് അവര്ക്കായില്ല.
മത്സരത്തിന്റെ ഗതി മാറ്റിയ നിമിഷം പിറന്നത് 39-ാം മിനിറ്റിലാണ്. ബോക്സിന് പുറത്തുനിന്ന് അന്റോണിയോ നുസ തൊടുത്ത ലോങ് റേഞ്ചര് ഷോട്ട് ഗോള്കീപ്പര് യഹിയ ഫൊഫാനയുടെ ശ്രമങ്ങളെയും അതിജീവിച്ച് വലയിലെത്തി. ഈ ഗോളോടെ കളിക്ക് വലിയ ജീവന് വെച്ചു. ഏകപക്ഷീയമായ ഒരു ഗോളിന്റെ ലീഡുമായാണ് നോര്വേ ഇപ്പോള് രണ്ടാം പകുതിയില് പന്ത് തട്ടുന്നത്. ഐവറികോസ്റ്റ് തിരിച്ചുവരാന് ശ്രമിക്കുന്നതോടെ ഡാലസിലെ പോരാട്ടം കൂടുതല് കടുക്കുമെന്നുറപ്പാണ്.
