തിരുവനന്തപുരം: വെള്ളാപ്പള്ളി നടേശനെതിരായ കേസുകളിലും 2019-ലെ പി.എസ്.സി പരീക്ഷാ ക്രമക്കേടുകളിലും സമഗ്രമായ പുനരന്വേഷണം നടത്തണമെന്ന ആവശ്യവുമായി യൂത്ത് ലീഗ് ദേശീയ സെക്രട്ടറി സികെ ശാക്കിര്‍. ഇതുസംബന്ധിച്ച നിവേദനം മുഖ്യമന്ത്രി വി.ഡി. സതീശനും ആഭ്യന്തര മന്ത്രി രമേശ് ചെന്നിത്തലയ്ക്കും നേരില്‍ കണ്ട് സമര്‍പ്പിച്ചു.

വെള്ളാപ്പള്ളി നടേശനെതിരെ വിവിധ സമയങ്ങളില്‍ ഉയര്‍ന്നിട്ടുള്ള നിയമവിരുദ്ധ പ്രവര്‍ത്തനങ്ങളുടെ ആരോപണങ്ങളില്‍ കൃത്യമായ നടപടിയുണ്ടാകുന്നില്ലെന്ന് സികെ ശാക്കിര്‍ ചൂണ്ടിക്കാട്ടി. മുന്‍ മുഖ്യമന്ത്രി വി.എസ്. അച്യുതാനന്ദന്‍ നല്‍കിയ മൈക്രോ ഫിനാന്‍സ് തട്ടിപ്പ് കേസില്‍ ഹൈക്കോടതി പോലീസിന്റെ അന്വേഷണത്തെ വിമര്‍ശിച്ചിരുന്നു. കേസില്‍ അടിയന്തരമായി അന്തിമ റിപ്പോര്‍ട്ട് സമര്‍പ്പിക്കണമെന്ന കോടതി നിര്‍ദ്ദേശം വന്നിട്ടും നടപടികള്‍ ഇഴയുകയാണ്. കൂടാതെ, എസ്.എന്‍.ഡി.പി നേതാവ് മഹേഷിന്റെ ആത്മഹത്യയുമായി ബന്ധപ്പെട്ട കേസില്‍ ഒന്നാം പ്രതിയായ വെള്ളാപ്പള്ളി നടേശന്‍ ഇതുവരെ ജാമ്യമെടുക്കാത്തത് നിയമസംവിധാനത്തിന് തന്നെ നാണക്കേടാണെന്നും അദ്ദേഹം പ്രസ്താവനയില്‍ പറഞ്ഞു. അടുത്തിടെ അദ്ദേഹം നടത്തിയ വിദ്വേഷ പ്രസംഗങ്ങള്‍ക്കെതിരെയും മാതൃകപരമായ നടപടി സ്വീകരിക്കണമെന്ന് അദ്ദേഹം ആവശ്യപ്പെട്ടു.

2019-ലെ പി.എസ്.സി പോലീസ് കോണ്‍സ്റ്റബിള്‍ പരീക്ഷാ ക്രമക്കേടില്‍ ഉള്‍പ്പെട്ടവരെയും, ഇതിന് കൂട്ടുനിന്ന ഉദ്യോഗസ്ഥരെയും നിയമത്തിന് മുന്നില്‍ കൊണ്ടുവരണമെന്നും സികെ ശാക്കിര്‍ ആവശ്യപ്പെട്ടു. എസ്.എഫ്.ഐ നേതാക്കളായ ശിവരഞ്ജിത്തും നിസാമും നടത്തിയ തട്ടിപ്പ് കേസ് അന്വേഷണം കാര്യക്ഷമമായിരുന്നില്ലെന്നും, ഇത് കേവലം രണ്ട് വ്യക്തികളില്‍ ഒതുക്കേണ്ടതല്ലെന്നും അദ്ദേഹം ചൂണ്ടിക്കാട്ടി. പി.എസ്.സി ഉന്നത ഉദ്യോഗസ്ഥരുടെ അറിവില്ലാതെ ഇത്തരം ക്രമക്കേടുകള്‍ നടക്കില്ലെന്നും, ലക്ഷക്കണക്കിന് അഭ്യസ്ഥവിദ്യരായ ഉദ്യോഗാര്‍ത്ഥികളെ ബാധിക്കുന്ന ഈ വിഷയത്തില്‍ ശരിയായ അന്വേഷണം നടന്നിട്ടില്ലെന്നും അദ്ദേഹം ആരോപിച്ചു. വിഷയത്തില്‍ സര്‍ക്കാര്‍ അടിയന്തരമായി ഇടപെട്ട് സമഗ്രമായ പുനരന്വേഷണം ഉറപ്പാക്കണമെന്നും അദ്ദേഹം ആവശ്യപ്പെട്ടു.