വണ്ടൂര്‍: ജി.സി.സി പള്ളിക്കുന്ന് മേഖല കെ.എം.സി.സി, 2025-2026 അധ്യയന വര്‍ഷത്തില്‍ എസ്.എസ്.എല്‍.സി, പ്ലസ് ടു പരീക്ഷകളില്‍ ഉന്നത വിജയം കരസ്ഥമാക്കിയ വിദ്യാര്‍ത്ഥികളെ ആദരിച്ചു. വായനാദിനത്തോടനുബന്ധിച്ച് പള്ളിക്കുന്ന് കാപ്പിച്ചാലില്‍ സംഘടിപ്പിച്ച ചടങ്ങില്‍ സൈഫുദ്ദീന്‍ വണ്ടൂര്‍ അധ്യക്ഷത വഹിച്ചു. ഇന്നത്തെ പൊതുവായ സാഹചര്യങ്ങള്‍ മോശമാണെന്നും, അതിലേക്ക് വഴുതി വീഴാതെ നാം നമ്മളെ ശ്രദ്ധിക്കണമെന്നും ഉന്നതങ്ങളില്‍ എത്തിച്ചേരാന്‍ വായന ശീലമാക്കണമെന്നും അധ്യക്ഷപ്രസംഗത്തില്‍ അദ്ദേഹം പറഞ്ഞു.
വണ്ടൂര്‍ ഗ്രാമപഞ്ചായത്ത് അംഗവും ആരോഗ്യ-വിദ്യാഭ്യാസ സ്റ്റാന്‍ഡിംഗ് കമ്മിറ്റി ചെയര്‍മാനുമായ ബൈജു ചടങ്ങ് ഉദ്ഘാടനം ചെയ്തു. വിദ്യാര്‍ത്ഥികള്‍ പണം ചെലവാക്കുമ്പോള്‍ അതിന്റെ ഉറവിടവും മാതാപിതാക്കളുടെ കഷ്ടപ്പാടുകളും തിരിച്ചറിയണമെന്നും, വിദ്യാഭ്യാസത്തെ മുഖമുദ്രയാക്കി മുറുകെപ്പിടിക്കണമെന്നും കെ.എച്ച്.എസ്.ടി.യു മുന്‍ സംസ്ഥാന പ്രസിഡന്റ് സി.ടി.പി. ഉണ്ണിമൊയ്തീന്‍ മാസ്റ്റര്‍ ഉത്ബോധിപ്പിച്ചു.
മുഖ്യപ്രഭാഷണം നടത്തിയ കെ.എസ്.ടി.യു മുന്‍ സംസ്ഥാന വൈസ് പ്രസിഡന്റ് ഫസല്‍ ഹഖ് മാസ്റ്റര്‍, ഹജ്ജ് കര്‍മ്മങ്ങളിലടക്കം കെ.എം.സി.സി നടത്തുന്ന സ്തുത്യര്‍ഹമായ സേവനങ്ങളെ പ്രശംസിച്ചു. ഏതു മേഖലയില്‍ പ്രവര്‍ത്തിക്കുമ്പോഴും ആത്മാര്‍ത്ഥത വേണമെന്നും, മുന്നോട്ടുള്ള യാത്രയില്‍ ഗുരുക്കന്മാരുടെ പാത പിന്തുടരണമെന്നും ആശംസയര്‍പ്പിച്ചുകൊണ്ട് എം.കെ. ഖമര്‍ സമാന്‍ (പഞ്ചായത്ത് യൂത്ത് ലീഗ് മുന്‍ ജനറല്‍ സെക്രട്ടറി) പറഞ്ഞു.
വണ്ടൂര്‍ ഗ്രാമപഞ്ചായത്ത് അംഗം സി.ടി. ചെറി, വണ്ടൂര്‍ പഞ്ചായത്ത് മുസ്ലിം ലീഗ് ജനറല്‍ സെക്രട്ടറി എം.കെ. നാസര്‍ എന്നിവരും ആശംസകള്‍ നേര്‍ന്നു. മലബാര്‍ മേഖലയില്‍ ഹയര്‍ സെക്കന്‍ഡറി കോഴ്‌സുകള്‍ക്ക് പ്രവേശനം ലഭിക്കാതെ ധാരാളം വിദ്യാര്‍ത്ഥികള്‍ പുറത്തുനില്‍ക്കുന്ന സാഹചര്യത്തില്‍, കൂടുതല്‍ പ്ലസ് ടു ബാച്ചുകള്‍ അനുവദിക്കണമെന്ന് വണ്ടൂര്‍ പള്ളിക്കുന്ന് മേഖല കെ.എം.സി.സി യോഗം സര്‍ക്കാരിനോട് ആവശ്യപ്പെട്ടു.
റഹ്‌മത്ത് തടത്തില്‍ സ്വാഗതവും ഷിഹാദ് കാവുങ്ങള്‍ നന്ദിയും പറഞ്ഞു. നീലാമ്പ്ര ബഷീര്‍, ടി.പി. റഹീം, നാണി വണ്ടൂര്‍, റഹ്‌മത്തുള്ള, ജുനൈദ് വണ്ടൂര്‍, ഹഫീഫ് എം.കെ, ഹസീന മഹ്‌മൂദ് എന്നിവര്‍ പരിപാടിക്ക് നേതൃത്വം നല്‍കി. വിജയികളായ വിദ്യാര്‍ത്ഥികള്‍ക്ക് മൊമെന്റോ നല്‍കി ആദരിച്ചു.
.jpg)
Related News
