തിരുവനന്തപുരം കോര്പ്പറേഷനിലെ 20 കൗണ്സിലര്മാരുടെ സത്യപ്രതിജ്ഞാ വിഷയത്തില് ഹൈക്കോടതി വിധി സ്വാഗതം ചെയ്ത് മേയര് വി.വി. രാജേഷ്. വിധിയെ പൂര്ണ്ണമായി മാനിക്കുമെന്നും അപ്പീലിന് പോകില്ലെന്നും അദ്ദേഹം വ്യക്തമാക്കി. കോടതി നിര്ദ്ദേശിച്ച സമയപരിധിക്കുള്ളില് തന്നെ സത്യപ്രതിജ്ഞാ ചടങ്ങുകള് പൂര്ത്തിയാക്കുമെന്നും, കൗണ്സിലര്മാരുമായി ആലോചിച്ച് പുതിയ തീയതി നിശ്ചയിക്കുമെന്നും അദ്ദേഹം അറിയിച്ചു.
അതേസമയം, നിയമപരമായ പ്രതിസന്ധികളുണ്ടെങ്കിലും ഭരണത്തെ അത് ബാധിക്കില്ലെന്ന ആത്മവിശ്വാസമാണ് മേയര് പ്രകടിപ്പിച്ചത്. ജയിലിലായ കൗണ്സിലര് ആര്. സുഗതന്റെ കാര്യത്തില് നിയമപരമായ പിന്തുണ നല്കുമെന്നും അദ്ദേഹം കൂട്ടിച്ചേര്ത്തു. കോടതി വിധി പ്രകാരം തിരഞ്ഞെടുപ്പ് വീണ്ടും നടത്തേണ്ടതില്ലെന്നത് തങ്ങള്ക്ക് അനുകൂലമാണെന്ന് ചൂണ്ടിക്കാട്ടിയ മേയര്, എതിര്ഭാഗം രാഷ്ട്രീയ പ്രേരിതമായാണ് കേസ് കൊടുത്തതെന്ന് ആരോപിച്ചു. ദൈവനാമത്തില് സത്യപ്രതിജ്ഞ ചെയ്ത മറ്റ് കൗണ്സിലര്മാരുടെ കാര്യത്തിലും നിയമവശം പരിശോധിക്കുമെന്നും അദ്ദേഹം പറഞ്ഞു.
എന്നാല്, ബിജെപിയുടെ നടപടികളെ രൂക്ഷമായി വിമര്ശിച്ചുകൊണ്ട് എല്ഡിഎഫ് കൗണ്സിലര് എസ്.പി. ദീപക് രംഗത്തെത്തി. വര്ഗീയത രാഷ്ട്രീയത്തിനായി ഉപയോഗിക്കുന്നുവെന്ന് ആരോപിച്ച അദ്ദേഹം, സത്യപ്രതിജ്ഞാ ചടങ്ങിനിടെ ഗണഗീതം പാടിയ നടപടി നിയമലംഘനമാണെന്ന് കുറ്റപ്പെടുത്തി. കോര്പ്പറേഷനെ ആര്എസ്എസ് കാര്യാലയമായി മാറ്റിയെന്നും, ഭരണഘടനാപരമായ മതേതരത്വം അട്ടിമറിക്കപ്പെട്ടുവെന്നും ദീപക് ആരോപിച്ചു. 45 ദിവസമായി കൗണ്സില് യോഗം ചേരാത്തത് ഭരണസ്തംഭനമാണെന്നും അദ്ദേഹം വിമര്ശിച്ചു.
Related News
