തിരുവനന്തപുരം: കേരള മുഖ്യമന്ത്രിയെ സംബന്ധിച്ച് എഐസിസി ഹൈക്കമാന്‍ഡ് കൈക്കൊള്ളുന്ന ഏത് തീരുമാനവും കോണ്‍ഗ്രസ്-യുഡിഎഫ് പ്രവര്‍ത്തകര്‍ പൂര്‍ണ്ണമനസ്സോടെ അംഗീകരിക്കുമെന്ന് മുതിര്‍ന്ന കോണ്‍ഗ്രസ് നേതാവ് രമേശ് ചെന്നിത്തല. ഡല്‍ഹിയില്‍ ഹൈക്കമാന്‍ഡ് ചര്‍ച്ചകള്‍ക്ക് ശേഷം മടങ്ങിയെത്തിയ അദ്ദേഹം മാധ്യമങ്ങളോട് സംസാരിക്കുകയായിരുന്നു.

'ഞങ്ങള്‍ക്ക് പറയാനുള്ള കാര്യങ്ങള്‍ ഹൈക്കമാന്‍ഡിനെ ബോധിപ്പിച്ചിട്ടുണ്ട്. അവര്‍ എല്ലാം കേട്ടു. ഇനി തീരുമാനം എടുക്കേണ്ടത് അവരാണ്,' ചെന്നിത്തല പറഞ്ഞു. ജനാധിപത്യപരമായ നടപടിക്രമങ്ങള്‍ പാലിക്കുന്നത് കൊണ്ടാണ് തീരുമാനത്തില്‍ കാലതാമസമുണ്ടാകുന്നതെന്നും അദ്ദേഹം കൂട്ടിച്ചേര്‍ത്തു. ബിജെപിയെ വിമര്‍ശിച്ച ചെന്നിത്തല, കോണ്‍ഗ്രസ് നാഗ്പൂരില്‍ നിന്നുള്ള നിര്‍ദ്ദേശങ്ങള്‍ക്കനുസരിച്ച് പ്രവര്‍ത്തിക്കുന്ന പാര്‍ട്ടിയല്ലെന്നും ഓര്‍മ്മിപ്പിച്ചു.

എഐസിസി അധ്യക്ഷന്‍ മല്ലികാര്‍ജുന്‍ ഖാര്‍ഗെയും രാഹുല്‍ ഗാന്ധിയും മൂന്ന് പ്രധാന അവകാശികളുമായി ചര്‍ച്ച നടത്തി രണ്ട് ദിവസം പിന്നിട്ടിട്ടും അന്തിമ തീരുമാനമായിട്ടില്ല. കെ.സി. വേണുഗോപാല്‍, വി.ഡി. സതീശന്‍, രമേശ് ചെന്നിത്തല എന്നിവരാണ് മുഖ്യമന്ത്രി പദത്തിനായി രംഗത്തുള്ള പ്രമുഖര്‍. ശനിയാഴ്ച ഡല്‍ഹിയില്‍ വെച്ച് ഖാര്‍ഗെ ഇവരുമായി കൂടിക്കാഴ്ച നടത്തിയിരുന്നു. കെപിസിസി പ്രസിഡന്റ് സണ്ണി ജോസഫ്, കേരളത്തിന്റെ ചുമതലയുള്ള എഐസിസി ജനറല്‍ സെക്രട്ടറി ദീപ ദാസ് മുന്‍ഷി എന്നിവരും ചര്‍ച്ചകളില്‍ പങ്കെടുത്തു. മുതിര്‍ന്ന നേതാവ് സോണിയ ഗാന്ധിയുമായി ഖാര്‍ഗെ നടത്തുന്ന കൂടിക്കാഴ്ചയ്ക്ക് ശേഷം ഇന്നുതന്നെ പ്രഖ്യാപനം ഉണ്ടായേക്കുമെന്നാണ് പാര്‍ട്ടി കേന്ദ്രങ്ങള്‍ നല്‍കുന്ന സൂചന.