ബീജിംഗ്- ചൈനയിലെ ഡാലിയനില്‍ മാതാപിതാക്കളെ തിരയുന്നതിനിടയില്‍ കെട്ടിടത്തിന്റെ പതിനൊന്നാം നിലയില്‍ നിന്നും താഴേക്ക് വീണ നാലു വയസ്സുകാരന്‍ അദ്ഭുതകരമായി രക്ഷപ്പെട്ടു. സിയാവോമിംഗ് എന്ന ബാലന്‍, വീട്ടില്‍ ആരുമില്ലാതിരുന്ന സമയത്ത് ജനല്‍ തുറന്ന് പുറത്തേക്ക് നോക്കുന്നതിനിടെയാണ് അപകടത്തില്‍പ്പെട്ടത്. മാതാപിതാക്കള്‍ സാധനങ്ങള്‍ ഡെലിവറി ചെയ്യാന്‍ പോയ സമയത്ത് ജനലിന്റെ സ്‌ക്രീന്‍ അണ്‍ലോക്ക് ചെയ്ത് കുട്ടി പുറത്തേക്ക് കടക്കുകയായിരുന്നു. 'അമ്മയെ കാണാന്‍ കൊതിയായതിനാലാണ്' എന്ന് കരുതിയാണ് താന്‍ ജനലിലൂടെ നോക്കിയതെന്ന് പിന്നീട് കുട്ടി പറഞ്ഞു.

ഏകദേശം രണ്ട് മണിക്കൂറിന് ശേഷം മടങ്ങിയെത്തിയ പിതാവാണ് കുട്ടിയെ കാണാനില്ലെന്ന് തിരിച്ചറിഞ്ഞത്. തുടര്‍ന്ന് നടത്തിയ തിരച്ചിലില്‍ കെട്ടിടത്തിന് താഴെ വീണുകിടക്കുന്ന നിലയില്‍ കുട്ടിയെ കണ്ടെത്തുകയും ഉടന്‍ തന്നെ ആശുപത്രിയില്‍ എത്തിക്കുകയും ചെയ്തു. കരള്‍, ശ്വാസകോശം, വൃക്ക തുടങ്ങിയ ആന്തരികാവയവങ്ങള്‍ക്ക് ഗുരുതരമായ പരിക്കും ഒന്നിലധികം ഒടിവുകളുമുള്ള അതീവ ഗുരുതരാവസ്ഥയിലായിരുന്നു സിയാവോമിംഗ്. കുട്ടി രക്ഷപ്പെടാന്‍ വെറും 5 ശതമാനം സാധ്യത മാത്രമാണ് ഡോക്ടര്‍മാര്‍ അന്ന് പ്രവചിച്ചിരുന്നത്.

എന്നാല്‍, ആഴ്ചകള്‍ക്ക് ശേഷം ലോകത്തെ അമ്പരപ്പിച്ചുകൊണ്ട് ആ കുരുന്ന് ജീവിതത്തിലേക്ക് തിരിച്ചുവരികയാണ്. മൂന്നാഴ്ചയോളം തീവ്രപരിചരണ വിഭാഗത്തില്‍ കഴിഞ്ഞ കുട്ടിയെ ഇപ്പോള്‍ ജനറല്‍ വാര്‍ഡിലേക്ക് മാറ്റി. കുട്ടിയുടെ ആരോഗ്യാവസ്ഥയില്‍ വലിയ പുരോഗതിയുണ്ടെന്നും ഉടന്‍ തന്നെ പൂര്‍ണ്ണ ആരോഗ്യം വീണ്ടെടുക്കാന്‍ സാധിക്കുമെന്നും ഡോക്ടര്‍മാര്‍ അറിയിച്ചു. മകന്റെ തിരിച്ചുവരവ് ഒരു വലിയ അദ്ഭുതമാണെന്നാണ് മാതാപിതാക്കള്‍ വിശേഷിപ്പിക്കുന്നത്.